Threads парақшасында ашық мәлімдеме жасаған әнші еліміздегі өнер саласындағы қысымдар туралы ойын жариялады.
Әнші Мөлдір Әуелбекова өзінің Threads әлеуметтік желісіндегі жазбасында мәдениет саласындағы еркін пікір білдірудің қиындығы мен қысым жайлы ашық мәлімдеді. Оның айтуынша, отандық концерттерде өнер иелеріне түрлі шектеулер мен тікелей қысым жасау жағдайлары жиі кездеседі.
“Көптеген концертте әншілерге қысым көрсетіледі. Әртістердің көбісі қара тізімге ілігуден қорқып, үндемей көнуге мәжбүр. Мен де солардың қатарында болдым. Бірақ енді үнсіз қала алмаймын! Айтамын! Жазамын!” – деп жазды Мөлдір.
Әншінің айтуынша, елімізде ашық пікір білдіруге тырысқан өнер өкілдерін бірден “құқықтық жауапкершілікпен” қорқыту әлі де кездесетін көрініс.
“Не себепті бізде әлі күнге дейін өз пікіріңді ашық айтсаң, бірден заңгермен сөйлесесің деп қорқытады? Қазір адамдардың барлығы көзі ашық, құқығын біледі. Мәселені мәдениетті түрде шешуді білмесеңдер – үйреніңдер!” – деп жазды ол парақшасында.
Бұған дейін Мөлдір Әуелбекова "Той-думан" фестивалінің ұйымдастырушылары әншілерден тегін өнер көрсетуді талап еткенін сынға алған. Алайда ол жазба кейін әлеуметтік желіден алынып тасталған.
