Белгілі әнші әрі актриса Меруерт Түсіпбаева Instagram желісіндегі парақшасында атышулы "Қозы Көрпеш – Баян сұлу" телехикаясына жұмсалған мемлекеттік қаржыға байланысты Баян Алагөзоваға талап қойды.
Әншінің сөзінше, сериал бюджет есебінен түсірілгенімен қоғам тарапынан – әсіресе зиялы қауым арасында жағымсыз пікірлер туғызған.
"Бұл жоба ұлттық арнадан көрсетілді, яғни халықтың салығынан түскен қаражатқа түсірілген. Ал басты рөлді сол кездегі әкімнің қызы ойнады. Мұндай" "түсініксіз кастинг" қалай мақұлданғаны түсініксіз", – деп мәлімдеді ол.
Меруерт Түсіпбаева продюсер Баян Мақсатқызының өзі мен жақтастары тарапынан жеке шабуылдарға тап болғанын айтты.
"Мен тек өз пікірімді білдірдім. Бірақ соның артынан Баян, Бағым және басқалар жабылып, боқтап, ар-намысыма тиді. «Сен ешкім емессің», «нөлсің», «талантсызсың» деген сөздер айтылды. Біз кезінде бірге оқыдық. Мен ол кезде музыка-драма бөлімінде оқыдым, ал ол жаңа ғана түскен еді. Мен жай ғана біреудің көлеңкесінен шыққан адам емеспін – білімім бар. Қажет болса, кез келген адамды заң аясында жауапқа тартқыза аламын", – деді Түсіпбаева.
Өнер иесі өзінің сыни пікір білдіргеннен кейін әлеуметтік желіде жеке басына бағытталған шабуылдар жиілегенін мәлімдеді. Ол бұл жағдайды мақсатты түрде ұйымдастырылған қаралау деп есептейді.
