Перизат Қайраттың мүлкі қазақстандықтарға сатылмақ: Тізімде элиталық үйлер мен қымбат көліктер бар

Аукционға шығарылатын мүлік

Сот үкіміне сәйкес, Перизат Қайраттың ұрланған қаражатқа сатып алынған мынадай мүлкі тәркіленді:

• Астанадағы элиталық Vela Village коттедж қалашығындағы жеке үй;
• Премиум-класс тұрғын үй кешендеріндегі пәтерлер: Akbulak Riviera, Sensata Plaza, Highvill Ishim Gold, «Көк Жайлау» (автотұрақ орындарымен бірге);
• Қымбат автокөліктер: Mercedes-Benz S450 (2024), Lexus LX 600 (2024), Mercedes-Benz EQE 500 4MATIC (2023), Haval H6 GT (2024);
• Rebel Flowers ЖШС-дегі 100% үлес (гүл бизнесі);
• 97 миллионнан астам теңге және 22 мың АҚШ доллары.

Сот ісі және үкім

25 шілдеде Астанадағы сот процесінде судья Сабыржан Кәрімов Перизат Қайрат пен оның анасы Ғайни Алашбаеваның ісін қарап, шешім шығарды.

Перизат Қайрат – 10 жылға бас бостандығынан айырылды.

Ғайни Алашбаева – 7 жылға сотталды.

Айып тағу негізі: 1,5 миллиардтан астам теңгені заңсыз иемдену, оның ішінде су тасқынынан зардап шеккендерге арналған қайырымдылық қаржысын жеке мақсатқа жұмсау.

Тәркіленген сән-салтанат заттары

Тергеу барысында элиталық жылжымайтын мүлік пен көліктерден бөлек, қымбат тұрмыстық техника мен брендтік аксессуарлар да алынды:

• Тұрмыстық техника: Miele кір жуғыш және кептіргіш машиналары, Bork көмір грилі мен робот шаңсорғышы.
• Аксессуарлар: Bulgari, Jimmy Choo, Cartier, Gucci, Dior көзілдіріктері; Loro Piana әйел аяқ киімінің 9 жұбы; Hermes, Prada, Gucci, Chanel белдіктері.