Қызыл кітапқа енген гүлдерді жұлып алғаны үшін әйел ірі көлемде айыппұл төлеуі мүмкін.
7 сәуір күні Түркістан облысында гүл жұлған әйелдің видеосы желіде тарады. Видео Telegram желісіндегі Halyqstan арнасында жарияланып, қоғам назарын аударды. Жергілікті полиция күдіктіні іздестіру жұмыстарын бастап кетті.
Кадрларда белгісіз әйел ашық далада қызғалдақ теріп жүргені байқалады. Болжам бойынша, ол Қызыл кітапқа енген Грейг қызғалдағының гүлдерін жұлған болуы мүмкін. Бұл әрекет — заңмен қатаң реттеледі. Түркістан облыстық Полиция департаменті қазіргі таңда видеодағы әйелді анықтау және ұстау шараларын жүргізіп жатқанын растады.
Қазақстан заңнамасына сәйкес, сирек кездесетін немесе жойылып кету қаупі бар өсімдіктерді заңсыз жұлғаны үшін қылмыстық жауапкершілік қарастырылған. ҚР Қылмыстық кодексінің 339-бабы бойынша:
- Айыпты тұлғаға 3000 АЕК-ке дейін (шамамен 11 769 000 теңге) айыппұл салынуы мүмкін;
- Немесе 800 сағатқа дейін қоғамдық жұмыстарға тартылуы мүмкін;
- Сонымен қатар, 3 жылға дейін бостандығы шектелуі не түрмеге қамалуы ықтимал;
- Қосымша жаза ретінде — мүлкін тәркілеу, белгілі бір қызметпен айналысу құқығынан 5 жылға дейін айырылу қарастырылған.
Полицияның мәліметінше, қазір тергеу амалдары жүргізіліп жатыр, ал оқиғаның нақты мән-жайы мен заңдық бағасы кейінірек хабарланады.
