$2 млн сыйақы алған киберспорт аңызы мансабын аяқтады

Counter-Strike тарихындағы ең табысты ойыншылардың бірі, төрт мейджордың чемпионы Лукас gla1ve Россандэр кәсіби мансабын аяқтап, бапкерлікке ауысатынын мәлімдеді. Бұл туралы ол X әлеуметтік желісіндегі жеке парағында жариялады.

Дания азаматы енді кәсіби бапкер ретінде жұмыс істегісі келетінін айтып, жаңа кезеңге дайын екенін жеткізді.

«Бапкер ретінде мен ерекше нәрсе ұсына алатыныма сенімдімін. Ойынның терең түсінігі, капитан ретінде жинаған тәжірибем және метаны білуім маған үлкен артықшылық береді. Мен сахнадағы қысымды жақсы меңгеремін. Барлық ойыншыдан бірдей нәрсе талап етпеймін, әрқайсысын жеке қарастырамын — бұл көптеген таланттардың жаңа деңгейге шығуына көмектеседі», — деді gla1ve.

Astralis-пен өткен алтын дәуір

gla1ve өз жазбасында мансабының ең жарқын кезеңі ретінде Astralis-тің «алтын құрамын» ерекше атап өтті.

• Ол Astralis құрамында төрт мейджор чемпионатын жеңіп алды.
• Командамен бірге ондаған Tier-1 турнирлерінде топ жарды.

Ол сондай-ақ жанкүйерлеріне, командаластарына және жақындарына көпжылдық қолдауы үшін алғыс білдірді.

Мансап жолы

• Counter-Strike кәсіби сахнасына 2010 жылы шықты.
• Ең үлкен жетістіктерге Astralis сапында жетті.
• Соңғы клубы — ENCE, онда ол шамамен екі жыл өнер көрсетті.
• Мансабында шамамен $2 млн сыйақы ұтты.