Қазақстандық киберспортшы Данил molodoy Голубенко HLTV.org порталының нұсқасы бойынша CS2 дисциплинасындағы 2025 жылдың үздік дебютанты атанды.
Қорытынды нәтижелер Counter-Strike әлемінің ең үздік өкілдері жиналған HLTV Awards 2025 салтанатты рәсімінде жарияланды.
FURIA Esports ұйымының ойыншысы бұл марапатқа таласта Team Falcons құрамындағы ресейлік Максим kyousuke Лукин мен Natus Vincere сапындағы косоволық Дрин makazze Шакирден озып шықты. Жүлдені Counter-Strike тарихындағы ең танымал ойыншылардың бірі, бельгиялық аңыз Адиль ScreaM Бенрлитом табыстады.
Кештің басты жеке сыйлығы – «Жыл ойыншысы» атағы қатарынан үшінші мәрте француз Матье ZywOo Эрбоға бұйырды. Ал molodoy маусым қорытындысы бойынша HLTV-дің жалпы рейтингінде алтыншы орынға көтерілді.
20 жастағы Данил Голубенко – Семей қаласының тумасы. Оның кәсіби сахнаға жолы өте жылдам өрбіді: 2025 жылдың көктемінде FURIA құрамында дебют жасап, жазда командамен бірге Астанада өткен PGL турнирінің жартылай финалына дейін жетті. Маусымның шарықтау шегі күзде болды – 21 қыркүйекте FURIA 1,2 миллион доллар жүлде қоры бар FISSURA Playgrounds 2 турнирінде жеңіске жетіп, Данил жарыстың MVP атағын иеленді.
