"Жетісу" футбол клубының бас бапкері Самат Смақовтың жары — Ума Смақова күйеуінің батылдығын жоғары бағалап, Instagram парақшасында мәлімдеме жасады. Ол қазақстандық футболдағы әділетсіздік пен үнсіздікке қарсы пікір білдіріп, жұртты бейжай қалдырмады.
Ума Смақова Instagram-да былай деп жазды:
"Басқалар ауыз ашуға қорқып жүргенде менің күйеуім шындық үшін алдыңғы шепте тұр. Қазақстан футболында Самат сияқты ешкімнен тайсалмайтын, ешбір “қамқорлықтың” астына тығылмайтындар өте аз. Көпшілігіне ұнамайтын шындықты айтуға ерік-жігер керек".
Бұл сөздер желі қолданушылары арасында қызу талқыға түсті.
Естеріңізде болса, Самат Смақов ҚПЛ-дің 5-турында "Ордабасы" командасына қарсы өткен матчтан (0:1) кейін төрешілер жұмысына қатаң баға берген еді. Сонымен қатар ол қазақстандық футболдың қазіргі жай-күйі мен болашағына қатысты өз ойын ашық жеткізді:
"Біздің футбол қайда бара жатыр? Жыл өткен сайын нашарлап барады. Әлем чемпионаты мен Еуропа? Ол туралы армандаудың өзі артық. Осындай бейберекет жағдайда біз ешқайда шықпаймыз", - деді ол.
