Қазақстан футболының жас таланты, "Қайрат" клубының шабуылшысы Дәулет Орынбасар ресейлік алпауыт командалардың назарын аударып отыр.
Өткен маусымда Дәулет Орынбасар Қазақстанның жасөспірімдер лигасындағы 17 ойында 28 гол соғып және 14 нәтижелі пас берді. Бұл көрсеткіштер оны лиганың ең тиімді ойыншыларының біріне айналдырды. Оның статистикасы тіпті Дастан Сәтпаевтың көрсеткішінен де асып түсті.
"Азия-Спорт" басылымының мәліметінше, "Қайрат" клубының иесі Қайрат Боранбаев Дәулет Орынбасардың трансфері бойынша ресейлік клубтармен келіссөздер жүріп жатқанын растады.
"Біз Дәулетті кез келген жерге сата салғымыз келмейді. Басты мақсатымыз — оның барған клубында негізгі құрамның тұрақты ойыншысы атануы", – дейді Боранбаев.
Оның айтуынша, жас футболшының әлеуеті өте жоғары, және ол келешекте халықаралық ареналарда да көзге түсуі мүмкін.
