Осылайша, "Қызылжардың" жаңа бас бапкері команда құрамын күшейтуді көздейді.
Қазақстан Премьер-лигасында өнер көрсететін петропавлдық «Қызылжар» клубының бас бапкері Милич Чурчич клубтың қазіргі ахуалы мен болашақтағы жоспарлары туралы пікір білдірді. Бұл туралы Aladop.kz хабарлады. Сербиялық маманның сөзінше, команда өз әлеуетін көрсетіп келеді, алайда алда әлі де маңызды жұмыстар күтіп тұр.
«Командамен енді ғана жұмыс істей бастадым. Бірақ алғашқы екі ойында жеңіске жеткеніміз қуантады. Бұл – өте маңызды нәтиже. Әсіресе "Атырауды" сырт алаңда жеңу біз үшін тарихи сәт: бұл 18 жылда алғаш рет тіркелді. Ол ойында жеңіс голын соңғы минутта соқтық. Футболшылар соңына дейін өздеріне сенді – бұл өте маңызды фактор», – деді Милич Чурчич.
Чурчич қазіргі құрамға сенім білдіретінін, алайда маусым-шілде айларындағы трансферлік кезеңде өзгерістер болуы мүмкін екенін айтты. Оның айтуынша, команданың селекциялық жұмысы нақты жоспар бойынша жүріп жатыр.
«Маусым айына дейін осы құраммен жұмыс істей береміз. Бірақ жазғы трансфер терезесі ашылған соң өзгерістер енгізуіміз мүмкін. Мен “Қызылжар” сапында Ресейден келген ойыншыларды көргім келеді. Олардың менталитеті қазақтарға ұқсас әрі бұл жаққа тез бейімделе алады», – деді бас бапкер.
Чурчич «Қызылжардың» тізгінін жуырда ғана ұстаған болатын. Бұған дейін клубты маусымға дайындаған Александр Бразевич қызметінен кеткен еді. Қазір «Қызылжар» турнирлік кестеде 8 ұпаймен 6-орынға жайғасқан.
Айта кетейік, команда келесі кездесуін 4 мамырда сырт алаңда қостанайлық «Тобылға» қарсы өткізеді.
