Жуырда бас бапкердің көмекшісі Елдос Ахметов бұл процес әлі де жоспарлы түрде жүріп жатқанын айтып, жаңа есімдерге есік ашық екенін мәлімдеді.
Қазақстан құрамасының бас бапкері Әли Ханалыұлы бас бапкер ретіндегі алғашқы баспасөз мәслихатында ұлттық құраманы жасарту қажеттігін баса айтқан болатын. Алайда наурыздағы матчтарда команда сапына 16 жастағы Дастан Сәтпаев қосылғанына қарамастан, ұжымының орташа жасы 28-ден асады.
Команда бапкерінің көмекшісі Елдос Ахметов бұл мәселе жайлы пікір білдірді:
"Иә, Әли Ханалыұлы жасартуды қолдайды. Бірақ біз бәрін бірден ауыстыра алмаймыз. 28 жас — бұл футболшы үшін шарықтау кезеңі. Әрине, бізде тәжірибелі ойыншылар да бар. Ал Сәтпаевқа келсек — ол әлі жас, оған біртіндеп мүмкіндік беру маңызды. Бізде бұл процес жоспарлы түрде жүріп жатыр", — деді ол.
Ахметов сондай-ақ, құрама сапына іріктеу критерийлеріне қатысты сұраққа да жауап берді:
"Бізде жабық тізім жоқ. Еуропа стандарттарын ұстануға тырысамыз. Клубтың атауына қарамаймыз. Мәселен, “Елімайдағы” Алмас Түлебай мен “Оқжетпестегі” Дәурен Жұмат — екеуі де бақылауымызда. Маусымдағы жиынға 25 үздік ойыншының тізіміне енуі әбден мүмкін. Қазір құрамаға жол ашық. Ең бастысы — деңгейге сай болу".
