Бекхэм өзінің футбол көзқарасын өзгерткен аңыз ойыншыны Миланда кездестіргенін айтты. Ол – бір ғана клубқа адал болып, 25 жыл бойы биіктен түспеген.
Англия аңызы Дэвид Бекхэм футбол тарихындағы үздік қорғаушыны атады. Бірақ көпшілік күткендей ол Рио Фердинанд немесе Серхио Рамос емес. Бекхэмнің пікірінше, ең үздік – италиялық Паоло Мальдини.
Дэвид Бекхэм өз мансабында «Манчестер Юнайтед», «Реал Мадрид», «ПСЖ» сияқты алпауыт клубтарда өнер көрсетті. Десе де, 2009–2010 жылдары «Милан» клубында жалда ойнаған кезеңі оның футбол көзқарасына үлкен әсер еткен.
Ол кезде Бекхэм Паоло Мальдинимен бір командада ойнау бақытына ие болды.
«Ол керемет еді. Нағыз көшбасшы, капитан және мен көрген ең үздік қорғаушы. Ол 41 жасында зейнетке кетті, бірақ сол жаста да 18-дегі ойыншы түсінбейтін жағдайларды оқи алатын. Бұл – ғажап деңгей», – деді Бекхэм.
Дебют: 1984 жылы «Милан» сапында
Мансап: «Милан» клубында 25 маусым
Жетістіктері:
7 рет — Италия чемпионаты (А Сериясы)
5 рет — Чемпиондар лигасы
Бірнеше мәрте — «Жылдың үздік қорғаушысы» атағын алды.
Бекхэмнің бұл пікірі футбол әлемінде Паоло Мальдинидің феноменін тағы бір дәлелдеді. Ол физикалық емес, футбол ақылымен және позициялық шеберлігімен көзге түскен қорғаушы. Жас футболшылар үшін Мальдини — шынайы үлгі.
