Қазақстандық футболдағы жетекші клубтардың бірі — "Астана" соңғы күндері қаржылық қиындықтарға байланысты қызу талқыланып жатыр. Осыған байланысты клубтың бас директоры Қайсар Бекенов арнайы мәлімдеме жасап, бұқаралық ақпарат құралдарында тараған ойыншыларға бес айлық жалақы берілмеді деген ақпаратты жоққа шығарды.
Бекенов "Nursultan Qurman" YouTube арнасына берген сұхбатында былай деп түсіндірді:
"Бес ай жалақы төленбеді деген ақпарат шындыққа сай емес. Егер біз футболшыларға үш айдан артық жалақы төлемесек, олар келісімшартты бұза алады. Қазір бәрі қаңтар мен ақпан айының жалақысын алды. Осы аптада немесе келесі аптада қалған мәселелер шешіледі деп ойлаймын. Бірақ бәрі бюрократиялық процестерге байланысты".
Бұл мәлімдеме клуб жанкүйерлері мен спорт сарапшылары арасында тараған алаңдаушылыққа жауап болды.
Еске сала кетейік, КПЛ-дің 8-турындағы "Тобылға" қарсы матчтан кейінгі (1:3) баспасөз мәслихатында "Астана" клубының бас бапкері Григорий Бабаян командада қаржылық қиындықтардың бар екенін алғаш рет ашық айтқан. Осы мәлімдемеден кейін БАҚ беттерінде түрлі ақпараттар тарала бастады.
