Германияның "Байер" клубында өнер көрсеткен нидерландтық қорғаушы Джереми Фримпонг мерсисайдтықтар сапына қосылды.
24 жастағы футболшы Англия чемпионымен ұзақ мерзімді келісімшартқа қол қойды.
Шетелдік БАҚ таратқан ақпарат бойынша, трансфер құны 35 миллион еуроға тең. Айта кетейік, Transfermarkt порталы Фримпонгтың нарықтық бағасын 50 миллион еуро деп бағалаған.
Келісімшартқа қол қойылған соң қорғаушы өз әсерін айтып берді:
"Барлығы өте жеңіл өтті. "Ливерпуль" маған қызығушылық танытқанын айтқан сәтте, шешімім анық болды. Агенттеріме тек: "Болды, келісімді аяқтаңдар" дедім. "Ливерпуль" жанкүйерлеріне уәде беремін — мен барымды саламын. Энергиямды, күшімді осы клубқа арнаймын. Біз жеңістерге бірге жетеміз деп сенемін. Осында келгеніме қуаныштымын", — деді Фримпонг.
Фримпонг өткен маусымда "Байер" сапында 48 матч өткізген. 5 гол соғып, 12 нәтижелі пас берді. Бұл — қорғаушы үшін өте жоғары көрсеткіш.
