Қазақстан ұлттық құрамасының баспасөз хатшысы Ермұхамед Мәулен Беларуське қарсы өткен ауыр жеңіліске қатысты иронияға толы пікірін білдірді. Сонымен қатар Өзбекстан құрамасының тарихи жетістігін ерекше атап өтті.
Әлеуметтік желідегі парақшасында ойын айтқан Мәулен матчтың алғашқы жартысындағы сәтсіздік туралы былай деді:
"31-минутта есеп 0:2 болды. Біз жеңіліп жатырмыз. Стадионда не күлуді, не жылауды білмедім. Алаңдағы қателіктерге қарап, енді тек күлу қалды, өйткені жылаудың пайдасы жоқ".
Қазақстандық маман дәл сол сәтте көршілес Өзбекстан құрамасының әлем чемпионатына алғаш рет жолдама алғанын естігенін атап өтті:
"Керемет жаңалық: Өзбекстан ұлттық құрамасы тарихында алғаш рет әлем чемпионатына жолдама алды! Өзбек бауырларымды шын жүректен құттықтаймын!"
Мәуленнің айтуынша, бүгінде өзбек футболы қазақстандық футболдан әлдеқайда алда тұр. Бірақ бұл шындықты көпшілік мойындағысы келмейді.
"Мен бұл туралы подкасттарымда айттым, бірақ біз әлі де мойындағымыз келмейді. Бүгінгі күн — соның нақты дәлелі. Біз 0:2 есебімен Беларусьтен жеңілудеміз, ал өзбектер әлем чемпионатына бара жатыр. Біздің ойыншылар гол соғуға ниет танытпайтын сияқты. Мұны қалай көтеруге болады?! Менің қазір Өзбекстанға көшкім келіп отыр!" — деп әзілдеді баспасөз хатшысы.
Айта кетейік, Беларусь — Қазақстан жолдастық кездесуі 4:1 есебімен аяқталып, жанкүйерлерге ауыр соққы болды. Ал дәл сол күні Өзбекстан құрамасы Араб Әмірліктерімен (0:0) тең ойнап, 2026 жылғы әлем чемпионатына алғаш рет тікелей жолдама алды. Дүбірлі дода АҚШ, Канада және Мексикада өтеді.
