Мадридтік "Реалдың" жаңа бас бапкері Хаби Алонсо маусым басталмай жатып клуб басшылығымен келіспеушілікке тап болды. Испаниялық Don Balon басылымының мәліметінше, бапкер "Реал Сосьедадтан" Мартин Субимендиді сатып алудан бас тартқанына қатты наразы.
Хаби Алонсо 26 жастағы жартылай қорғаушыны өзінің тактикалық жоспарына сай келетін негізгі ойыншы ретінде қарастырған. Оның Тони Кроос пен Лука Модричтің кетуінен кейін орталық алаңдағы бос орынды толтырады деп сенген.
Бапкердің пікірінше, Орельен Тчуамени мен Эдуардо Камавинга өздеріне жүктелген міндетті толық орындай алмайды, ал Федерико Вальверде жиі өзіне тән емес позицияларда ойнауға мәжбүр.
Айта кетейік, Алонсо Субимендиге етене таныс. Олар бұған дейін "Реал Сосьедадтың" екінші құрамында бірге жұмыс істеген. Сонымен қатар бапкер Субимендидің Ұлттар лигасындағы Испания құрамасы сапындағы соңғы ойындарына жоғары баға берген.
Оның келісімшартындағы 60 миллион еуро көлеміндегі өтемақы "Реал" үшін тым қымбат саналмаған. Соған қарамастан келіссөздер басталмады.
Мәліметтерге сүйенсек, клуб президенті Флорентино Перес бұл трансферге байланысты ешқандай нақты қадамға бармаған. Нәтижесінде Мартин Субименди "Арсеналдың" ұсынысын қабылдап, жақын күндері ресми түрде лондондықтардың ойыншысы ретінде таныстырылады.
