Павлодарлық "Ертіс" футбол клубының басшылық құрамында ауыс-түйістер болды.
“Серый CARDINAL” Telegram-арнасы таратқан ақпаратқа сәйкес, клубтың бұрынғы басшылығы Павлодар облысының әкімі Асайын Байхановтың шешімімен қызметінен шеттетілген немесе басқарудан алшақтатылған. Бұл өзгерістер команданың соңғы уақытта тұрақсыз ойын көрсетуіне және бапкерлік құрамдағы жиі ауыс-түйіске байланысты болуы мүмкін.
Негізгі себеп – “Ертістің” Премьер-лигаға шығуы күмән туғыза бастады. Қазір павлодарлықтар турнирлік кестеде екінші орында тұр. Жеңіліс көрмесе де “Каспийден” үш ұпайға қалып отыр. Сонымен қатар “Шахтер” мен өскемендік “Алтай” клубтары өкшелеп келеді.
Спорттық бағыттағы жұмысқа Данияр “Дони” Шадиев жетекшілік етпек. Ол бұған дейін “Тұран” клубының табысты бастамасында көзге түскен. Енді “Ертісте” спорттық бөлімнің жетекшісі немесе сол маңдағы маңызды лауазымдардың бірін иеленуі мүмкін.
“Ертістің” басты мақсаты – ел чемпионатының жоғары дивизионына оралу. Бірақ маусымның шешуші кезеңіне аяқ басқан тұста мұндай кадрлық өзгерістер команданың ішкі ахуалына қалай әсер ететіні белгісіз. Жанкүйерлер мен сарапшылар жаңа менеджменттің алға қойған міндеттерді орындай алатынына үміт артып отыр.
