Финалдық ысқырықтан кейін ойыншылар арасында алаң сырты нағыз қақтығыс алаңына айналды. Бұл сәттің видеосы әлеуметтік желілерде лезде тарады.
Клубтық деңгейдегі әлем чемпионатында оқыс оқиға болды. «Интер» мен «Ривер Плейт» арасындағы матчтан кейін футболшылар бір-біріне жұдырық ала жүгірді. Жанкүйерлер қақпадан емес, қақтығыстан естен танды.
2025 жылдың 26 шілдесінде АҚШ-тың Вашингтон штатындағы «Люмен Филд» стадионында Клубтық әлем чемпионатының топтық кезеңі аясында Италияның «Интері» мен Аргентинаның «Ривер Плейт» командалары кездесті.
Ойын 2:0 есебімен миландықтардың пайдасына аяқталды. Франческо Эспозито 72-минутта есеп ашса, жеңісті нығайтқан екінші голды Алессандро Бастони 90+3 минутта соқты.
Алайда матчтағы ең шулы сәттер голдар емес, қақтығыстар болды. Аргентиналық қорғаушы Маркос Акунья мен нидерландтық ойыншы Дензел Думфрис ойын бойы бір-біріне сөз қайтарып, бірнеше рет шиеленіс тудырды. Төрешілер бұл қақтығыстардың алдын алуға тырысқанымен, жанжал финалдық ысқырықтан кейін өршіді.
Ойын біткен соң трибуна астына кететін жолда жаппай төбелес басталды. Оқиға орнында футболшылар, бапкерлер және команда өкілдері болғанымен, Акуньяны әрең ұстап қалды. Ал Думфрис жылдам шешіну бөлмесіне кетіп қалды.
Бұл сәттің видеосы әлеуметтік желілерде тарап, жанкүйерлердің қызу талқысына түсті.
Осылайша, «Интер» плей-офф кезеңіне жолдама алып, 1 шілдеде Бразилияның «Флуминенсе» клубымен кездеседі. Ал «Ривер Плейт» турнирден шығып қалды.
