Вьетнамдағы құрлықтық чемпионатта Қазақстан құрамасы 7 алтын медаль жеңіп алып, жалпыкомандалық есепте Таиландтан кейін екінші орынға тұрақтады.
Қазақстан құрамасы биылғы Азия чемпионатына 24 спортшымен қатысты. Жарысқа Азия және Тынық мұхиты аймағынан 20 елден 200-ге жуық спортшы жиналды.
Спортты дамыту дирекциясы таратқан ақпаратқа сүйенсек, ел намысын қорғаған спортшылар A санатында (ересектер мен 23 жасқа дейінгілер) 7 алтын, 7 күміс және 6 қола медаль иеленген.
Ұлттық құрама капитаны Әбіл Ғалиев тарихи жетістікке жетті. Ол муай-тайдан екі мәрте Азия чемпионы атанған тұңғыш қазақстандық ретінде спорт тарихында қалды.
Даяна Дүйсенғали чемпионат барысында ерекше көзге түсіп, "Турнирдің үздік әйел спортшысы" деген марапатқа ие болды. Бұл оның шеберлігі мен еңбекқорлығын тағы бір мәрте дәлелдеді.
Азия муай-тай федерациясы (FAMA) Қазақстан ұлттық құрамасына "Best fair play team" – "Ең әділ ойнаған команда" атағын табыстады. Бұл марапат – спортшыларымыздың тек нәтижемен емес, спорттық мәдениетімен де ерекшеленгенін көрсетеді.
