Мәскеудің «Спартагы» жартылай қорғаушыға қызығушылық білдіріп отыр. Бұған дейін «Зенит», «Динамо» және ЦСКА да оны қайтаруға ниет танытқан.
Қазақстан ұлттық құрамасы мен түріктің «Бешікташ» клубында өнер көрсететін жартылай қорғаушы Бақтиер Зайнутдиновтың болашағына қатысты болжам айтылды.
Ресейлік спорт журналисі Александр Троицкий өзінің «Азия-Спорт» телеграм-арнасында «Спартак» клубының Зайнутдиновке қызығушылық танытып отырғанын хабарлады. Журналистің айтуынша, Бақтиердің мансабы қайтадан Ресей чемпионатына оралуы мүмкін.
«Бақтиерге Мәскеудің “Спартагы” қызығып отыр. Бұған дейін “Зенит” пен “Динамо” да қызығушылық танытты. Тіпті, ЦСКА-ға қайта оралады деген сыбыс шықты. “Реал Мадрид” туралы да әңгімелер болды, бірақ ол әзірге шындыққа жанаспайды», — деп жазады Троицкий.
Түркиялық «Бешікташ» клубы Бақтиердің трансфері үшін 4 миллион еуро сұрап отыр. Алайда журналист бұл бағаның астарында ирония бар екенін де жасырмайды:
«Ойнап алды, жарақаттады, енді қайтармақшы...», — деп жазды ол.
2024 жылғы маусымда Зайнутдинов жарақатына байланысты небәрі 12 матчқа қатысып, бір ғана нәтижелі пас берген. Бұл сандар оның толыққанды маусым өткізе алмағанын көрсетеді.
