Абдукодир Хусановтың трансферінен кейін ағылшын алпауытының Орталық Азияға деген қызығушылығы артуда.
"Манчестер Сити" мен оның иесі City Football Group (CFG) Өзбекстанда жаңа футбол бағытын қарастыруда. Бұл туралы Ұлттық Олимпиада комитеті төрағасының бірінші орынбасары Отабек Умаров ресми түрде мәлімдеді.
Оның айтуынша, CFG Өзбекстандағы футбол клубтарының бірін сатып алып, өз халықаралық желісіне қосу жоспарын пысықтап жатыр. Ішкі дереккөздерге сүйенсек, бұл команда "Коканд-1912" болуы мүмкін.
Отабек Умаровтың сөзінше, өзбек жас жұлдызы Абдукодир Хусановтың "Манчестер Сити" құрамына өтуі миллиондаған жаңа жанкүйерлердің назарын ағылшын клубына аудартқан.
"Өзбекстанда 37−38 миллион халық бар. Енді Қырғызстан, Қазақстан, Тәжікстан және Түрікменстан секілді көрші елдердің де жанкүйерлері "Сити" клубын тұрақты түрде қадағалап отыр", – деді Умаров.
Умаровтың айтуынша, CFG келесі қадам ретінде тағы бір өзбек ойыншысын шақырып, өзінің спорттық құрылымына 13-клуб ретінде Өзбекстан командасын қосқысы келеді.
"Бүгінде CFG құрамында 12 футбол командасы бар. Жақын болашақта олардың қатарына Өзбекстаннан 13-клуб қосылуы ықтимал", – деп нақтылады НОК басшысы.
Отабек Умаров тамыз айында Өзбекстан делегациясы Англияға барып, клубтың ойыншы таңдау, жаттығу мен оқыту жүйесімен танысуды жоспарлап отырғанын мәлімдеді.
"Біз бұл бағытта нақты жоспар құрып жатырмыз. Жұмыс әлі де көп", – деді ол.
