Шымкенттіктер еурокубоктық ойындар қарсаңында құрамын жаңа ойыншымен толықтырмақ. Команда украиналық жартылай қорғаушы Владислав Наумецпен келісімшарт жасасуға жақын.
"Серый CARDINAL" телеграм-арнасының мәліметінше, Владислав Наумец қазірдің өзінде клуб базасына келген және ертең ресми түрде таныстырылады деп күтілуде. Клуб өкілдерінің айтуынша, ойыншы солақай, шапшак, әрі техникалық шеберлігі жоғары футболшы ретінде сипатталады. Бұл трансфер шымкенттік команда үшін айтарлықтай нығайту болмақ.
26 жастағы украиналық жартылай қорғаушы бұған дейін өз елінің "ЛНЗ Черкассы" клубында ойнаған. Transfermarkt порталының дерегінше, оның қазіргі нарықтық құны 300 мың еуро.
Қазір "Ордабасы" ҚПЛ маусымында 12 ойын өткізіп, 19 ұпай жинаған. Бұл нәтиже оларды турнирлік кестеде 7-орынға жайғастырып отыр. Жанкүйерлер командадан алдағы уақытта тұрақты нәтиже күтуде, ал Наумецтің келуі бұл жолда маңызды рөл атқаруы мүмкін.
