Бразилиялық шабуылшы Винисиус Жуниор мен мадридтік "Реал" клубының арасында жаңа келісімшарт бойынша жағдай ушығып тұр. Жұлдызды футболшының командадан кетуі мүмкін деген сыбыстар футбол әлемін дүр сілкіндірді.
Фабрицио Романо және басқа беделді инсайдерлердің хабарлауынша, Винисиус жылына 30 миллион еуро көлемінде жалақы талап етіп отыр. Сонымен қатар жаңа келісімшартқа қол қойса, қосымша бонус төлеуді сұраған.
Алайда футболшының жақын ортасы бұл ақпаратты жоққа шығарып, клубпен келісімшарт бойынша нақты уағдаластық жасалмағанын мәлімдеді.
"Қазір Винисиус “Реалмен” жаңа келісімге келді деу – асыра сілтеу. Әзірге ешқандай нақты келісім жоқ", – дейді футболшыға жақын дереккөздер.
Оқиғаны ушықтырған тағы бір фактор — Винисиустың әлеуметтік желідегі әрекеті. Ол Instagram мен басқа платформалардан “Real Madrid” деген жазбаны профилінен алып тастаған. Бұл жанкүйерлер арасында түрлі пікір мен алып-қашпа әңгімелерге себеп болды.
Бұған дейін испандық жанкүйерлердің бір бөлігі Винисиуске ашық түрде “кет!” деп жазып, қысым көрсеткен еді. Футболшының бұл реакциясы дәл осы сындарға жауап ретінде қабылданып отыр.
Мадридтіктер тарапынан әзірге ресми мәлімдеме жасалған жоқ. Бірақ клуб үшін Винисиус – стратегиялық маңызды ойыншы, сондықтан тараптар келісімге келуге тырысады деген болжам бар.
