«Манчестер Юнайтед» клубы өздерінің ресми әлеуметтік желілерінде Брайан Мбеумоның трансферін жариялап, жанкүйерлеріне жаңа ойыншыны таныстырды. Камерундық шабуылшы енді алдағы бес жыл бойы «Олд Траффордта» өнер көрсетеді.
Мбеумоның трансфері 65 миллион фунт стерлингке бағаланып отыр, ал тағы 6 миллион фунт түрлі бонус түрінде төленуі мүмкін. Бұл келісім «Брентфорд» тарихындағы ең қымбат сатылым ретінде тіркеліп отыр.
«Манчестер Юнайтед» ресми хабарламасы бойынша, келісім толық аяқталып, ойыншы медициналық тексеруден өткен соң келісімшартқа қол қойды.
25 жастағы Брайан Мбеумо 2024/25 жылғы маусымда АПЛ-да 20 гол соғып, 8 нәтижелі пас берді. Бұл көрсеткіш оны лигадағы ең өнімді вингерлердің біріне айналдырды. Ол 2019 жылдан бері «Брентфорд» сапында ойнап келді, ал оған дейін Францияның «Труа» клубында өнер көрсеткен.
Клубтың баспасөз қызметіне берген алғашқы сұхбатында Брайан өзінің арманы орындалғанын айтты:
«Манчестер Юнайтедке» ауысу мүмкіндігі пайда болған сәттен бастап, бұл шешімге еш ойланбастан келістім. Бұл — бала кезден жанкүйері болған арман клубым. Менің мақсатым – күн сайын өзімді жетілдіру. Рубен Аморимнің қол астында және үздік ойыншылармен бірге жаңа деңгейге шығуға сенімдімін», — деді Мбеумо.
Трансферлік келіссөздер оңайға соқпаған. ESPN журналисі Роб Доусонның хабарлауынша, «Манчестер Юнайтед» басшылығы «Брентфордтың» келіссөздер жүргізу стиліне қанағаттанбаған. Келісімшарт сомасы бірнеше рет өзгеріп, бастапқыда 70 миллион фунт және 7 миллион бонус ұсынылған.
«Брентфорд» Мбеумоға «Ньюкасл» және «Тоттенхэм» клубтарының ұсыныстарын да қарастыруды ұсынған», – дейді Доусон өз дереккөздеріне сүйене отырып.
Еске сала кетейік, 2024/25 маусымында «Юнайтед» АПЛ-да 15-орын алып, 42 ұпаймен маусымды аяқтаған болатын. Олар Еуропа лигасының финалына жеткенімен, жаңа маусымда еурокубоктарға қатыса алмайды.
