Ресейлік маман Станислав Черчесов Грозныйдың "Ахмат" ФК жаңа бас бапкері болып тағайындалды.
6 тамыз күні Шешенстан астанасының командасы бұған дейін ұжымды жаттықтырып келген Александр Сторожук пен оның штабының отставкаға кеткенін мәлімдеді. Сторожук маусым айында ғана қызметке кіріскен. Бірақ оның жетекшілігімен “Ахмат” Ресей премьер-лигасында үш матчта жеңіліп, Кубокта да бір ойында ұтылды.
Осылайша клуб жазғы трансферлік терезе жабылмай тұрып, бас бапкерді ауыстыруға шешім қабылдады.
61 жастағы Станислав Черчесовпен 2028 жылға дейін келісім жасалды. Ол “Ахмат” клубын (бұрынғы «Терек») бұған дейін де 2011–2013 жылдары басқарған.
Черчесов үшін бұл — Қазақстан ұлттық құрамасынан кеткеннен кейінгі алғашқы клубтық жұмыс.
Еске сала кетейік, оның жетекшілігімен Қазақстан 2024 жылғы Ұлттар лигасында 5 матчта жеңіліп, 1 тең ойынмен төменгі дивизионға түсіп қалған еді.
Айта кету керек, «Ахмат» сапында қазір Қазақстан құрамасының шабуылшысы Максим Самородов өнер көрсетіп жүр. Яғни Самородов Черчесовпен қайтадан бірге жұмыс істейді.
