"Қайрат" Чемпиондар лигасының үшінші іріктеу кезеңінде тарихи жеңіске жетті. Алматылықтар Братиславаның "Слованына" қарсы соңғы минутта пенальти арқылы жанкүйерлерін қуантты.
Кездесу Алматыдағы Орталық стадионда өтті. Ойынға Нидерландтық төреші Сердар Гөзюбүйүк бастаған қазылар алқасы төрелік етті.
Бірінші таймда алаң иелері басымдық танытты. "Қайрат" бірнеше қауіпті сәттер ұйымдастырғанымен голға айналдыра алмады. Ал екінші таймда қонақтар шабуылға белсенді кірісті. Ойынның 85-минутында Рахим Ибрахим қызыл қағаз алып, "Слован" бір ойыншысынан айырылды. Осы сәттен кейін Рафаэль Оразбахтиннің шәкірттері шабуылды үдетіп, қарсыласын қыспаққа алды.
Алаңда артық бір ойыншымен ойнаған алматылықтар 90-минутта есеп ашты. Дастан Сәтпаев пенальтиді сәтті орындап, командасына жеңіс сыйлады — 1:0. Бұл — "Қайраттың" Чемпиондар лигасының үшінші іріктеу кезеңіндегі алғашқы тарихи жеңісі.
