Алматылық «Қайраттың» бұрынғы ойыншысы Андрей Ульшин Чемпиондар лигасының шешуші кездесуінде команда өз алаңда сенімді ойын көрсетіп, жанкүйерлерін қуантады деп есептейді.
Алматылық «Қайраттың» бұрынғы ойыншысы Андрей Ульшин Чемпиондар лигасының екінші іріктеу кезеңіндегі қарымта матч қарсаңында жанкүйерлерге оптимизм сыйлады. Sports24.kz-ке берген сұхбатында ол команда өз алаңында мықты өнер көрсететініне сенімді екенін жеткізді.
Ульшиннің айтуынша, алматылық ұжым «Слованға» лайықты қарсылық көрсетіп, жеңіліссіз нәтиже тіркей алады:
«Бүгін “Қайрат” жеңілмейді деп есептеймін. Команда қарсыласқа лайықты қарсылық таныта алады. Матч тартысты, әрі қызықты өтетіні сөзсіз. “Слован” – өте мықты қарсылас», – деді Андрей Ульшин.
Бүгін, 6 тамызда, сағат 20:00-де Алматының Орталық стадионында «Қайрат» пен Братиславаның «Слованы» екінші ойынды өткізеді. Бұл жұптағы жеңімпаз Чемпиондар лигасының плей-офф кезеңіне жолдама алып, Шотландияның «Селтигімен» кездеседі.
Жеңілген команда өз жолын Еуропа лигасының іріктеу кезеңінде жалғастырады. Ол жерде қарсылас — Швейцарияның «Янг Бойз» клубы болады.
