Қазақстан құрамасының экс-бас бапкері, қазір "Крылья Советов" тізгінін ұстаған Магомед Адиев өзінің бұрынғы шәкірті — 23 жастағы қазақстандық вингер Максим Самородовты командасына алғысы келеді. Бұл туралы ол "РБ Спорт" тілшісіне берген сұхбатында мәлімдеді.
Адиев Самородовпен 2022–2024 жылдары Қазақстан құрамасында, ал 2024 жылы "Ахмат" клубында бірге жұмыс істеген. Қазір Максим Грозный клубында өнер көрсетеді. Ал 2025 жылдың 6 тамызында "Ахматтың" тізгінін тағы бір экс-бапкер — Станислав Черчесов ұстады.
"Самородов — ерекше стильдегі футболшы, техникалық арсеналы мықты. Қазір біз оны шорт-листке қоспадық. Бірақ егер бір күні онымен қайта жұмыс істеуге мүмкіндік туса — мен оны үлкен қуанышпен қабылдаймын", — деді Адиев.
Адиев Самородовтың "Крылья Советовке" ауысуы нақты жоспар емес екенін айтып өтті.
Клуб трансферге қаржы жұмсауға дайын емес – команда тек еркін агенттермен немесе жалға берілетін футболшылармен жұмыс істеп жүр.
Самородовпен бұл тақырып талқыланбаған – дегенмен олардың жеке байланыстары өте жақын: "Менің ағам оған Грозныйда көмектеседі. Ол менің ата-анамды біледі. Бірақ ауысу туралы сөйлескен жоқпыз", — деді бапкер.
"Ахмат" футболшыдан бас тартатын жағдай болса — трансферге жол ашылады. Барлығы алдағы жарты жылда өзгеруі мүмкін", — дейді Магомед Адиев.
Максим Самородов 2024 жылдың тамызында "Ақтөбе" клубынан "Ахматқа" ауысып, 2028 жылдың 30 маусымына дейін келісімшартқа отырған.
Transfermarkt дерегі бойынша, оның нарықтық құны — 2,5 миллион еуро.
РПЛ-2025/26 маусымында "Крылья Советов" үш турдан кейін 7 ұпаймен екінші орында, ал "Ахмат" әзірге 0 ұпаймен 13-орында тұр.
