Ламин Ямаль мен аргентиналық әнші Ники Николь арасындағы роман әлеуметтік желіні шулатты. 17 жастағы «Барселона» ойыншысы әйгілі әншімен бірге байқалып, жанкүйерлер арасында жаңа қызу талқы туғызды.
Футбол әлемінің басты вундеркинді Ламин Ямаль жеке өмірімен тағы да жанкүйерлер назарын өзіне аударды. Еуро-2024 турнирінен кейін ол бұрынғы сүйіктісімен қош айтысып, жаңа махаббат хикаясына кіріскені жайлы ақпарат тарады. Бұл жолы испаниялық жас жұлдыздың жүрегін 24 жастағы аргентиналық әнші Ники Николь жаулаған сыңайлы.
Танымал испан журналисі Хави де Хойостың айтуынша, Ламин мен Ники бір шарадан кейін бірге шығып, түнгі төртте жағажайда сүйісіп тұрғаны байқалған. Ресми растау болмаса да, журналист сенімді дереккөзге сілтеме жасап отыр.
Айта кетейік, Ники Николь — Аргентинада ғана емес, Испанияда да танымал әнші. Оның 2018 жылдан бері жарыққа шыққан туындылары арасында ең танымалы — Mamichula атты сингл. Бұл ән Аргентина мен Испания чарттарында бірінші орын алған.
Бұған дейін БАҚ Ламин Ямальды 30 жастағы модель Фати Васкеспен байланыстырған болатын. Бірақ футболшы бұл ақпаратты жоққа шығарып, олар жай ғана достар екенін айтқан.
