Тергеу дерегінше, мониторинг тобының мүшелері қызмет бабын пайдаланып, тексеріс нәтижесін оң шешу үшін ақша бопсалаған.
Қызылордада балалар спорты мен шығармашылығын қолдауға арналған «Даму бала» платформасы арқылы қызмет көрсететін кәсіпкерлерден 88 миллион теңгеден астам қаражат жымқыру ісі бойынша сот үкімі жарияланды.
Қызылорда облысы бойынша Қаржылық мониторинг агенттігінің департаменті жүргізген тергеу барысында анықталғандай, мониторингтік топтың бір мүшесі қызмет бабын пайдаланып, сыбайласымен бірге кәсіпкерлерге тексеріс қорытындысын «оң шешіп береміз» деген желеумен ақша бопсалаған.
Жиналған қаражаттың бір бөлігі коттедж бен автокөлік сатып алуға жұмсалған. Сот санкциясымен бұл мүлікке тыйым салынды.
Сот басты айыпталушыны кінәлі деп тауып, 6 жылға бас бостандығынан айыру және мүлкін тәркілеу жазасын тағайындады. Оның сыбайласы 5 жылға шартты түрде сотталды.
Үкім заңды күшіне әлі енген жоқ.
