Сонымен қатар, матч Еуропадан тыс жерде өтуі мүмкін.
The Telegraph таратқан ақпаратқа сәйкес, УЕФА Суперкубогының форматы өзгеруі ықтимал. Жаңа нұсқаға сай, турнирге қазіргі екі команданың орнына төрт ұжым қатысуы мүмкін. Қатысушыларды іріктеу тәртібі әзірге белгісіз, бірақ қазіргідей Чемпиондар Лигасы мен Еуропа лигасы жеңімпаздары міндетті түрде тізімде болады.
Суперкубок форматын кеңейту идеясы бұған дейін қаралғанымен, қабылданбаған еді. Алайда қазір бұл ұсыныс қайтадан талқыланып жатыр. УЕФА бұл мәселеде медиақұқықтарды сатумен айналысатын америкалық Relevent компаниясымен бірлесе жұмыс істеуде.
Тағы бір маңызды өзгеріс – Суперкубоктың Еуропадан тыс жерде өту ықтималдығы. Негізгі нұсқалардың қатарында АҚШ пен Таяу Шығыс елдері бар. УЕФА президенті Александер Чеферин бұған дейін Лига чемпионаты матчтарын АҚШ-та өткізу идеясы талқыланғанын және бұл мүмкін екенін ашық айтқан.
