Соңғы минуттағы драма: «Ливерпуль» АПЛ маусымын жарқын жеңіспен бастады (ВИДЕО)

Кездесуді манчестерлік төреші Энтони Тейлор басқарды. Бұл кездесуде Арне Слот төрт бірдей жаңа ойыншысын негізгі құрамға қосты: Джереми Фримпонг, Милош Керкез, Флориан Вирц және Уго Экитике. Ал «Борнмут» алаңға — Джордже Петрович, Бафоди Диаките және Адриен Трюфферді алғаш рет шығарды.

Голдар хронологиясы

• 37-минут – Уго Экитике есеп ашып, «Ливерпульді» алға шығарды.
• 49-минут – Коди Гакпо есепті 2:0-ге жеткізді.
• 64-минут – «Борнмут» шабуылшысы Антуан Семеньо бір доп қайтарды.
• 76-минут – Сол Семеньо дубль жасап, есепті теңестірді – 2:2.
• 89-минут – Федерико Кьеза шешуші гол соғып, «Энфилд» стадионың дүр сілкіндірді.
• 90+4-минут – Мұхаммед Салах соңғы нүктені қойды – 4:2.

Өткен маусымның нәтижесі

Өткен маусымда Арне Слот жаттықтыратын «Ливерпуль» 84 ұпаймен чемпион атанған болатын. Ал «Борнмут» 56 ұпай жинап, турнирлік кестенің тоғызыншы сатысында аяқтады.

Эмоцияға толы кеш

Бұл ойын тек спорттық тартыспен ғана емес, эмоциялық сәттерімен де есте қалды. Матч алдында жанкүйерлер мен ойыншылар Диогу Жота мен оның бауыры Андре Силваны еске алды. Гүл шоқтары, әсерлі «You'll Never Walk Alone» әні, бір минут үнсіздік және стадиондағы арнайы хореография – бәрі де футбол кешіне ерекше реңк берді.

Жаңа маусымдағы алғашқы ойын Премьер-лиганың қарқынын бірден сездірді. «Ливерпуль» қиын сәттерді еңсеріп, чемпиондық мінез көрсетті, ал Федерико Кьеза күтпеген қаһарманға айналды.