2025 жылдың жазғы трансфер маусымында "Манчестер Сити" құрамын жас әрі дарынды ойыншымен толықтырды. 21 жасар француз жартылай шабуылшы Райан Шерки "Лионнан" ауысып, 2030 жылға дейін есептелген бес жылдық келісімшартқа қол қойды.
Ағылшын клубы бұл келісім үшін 36 миллион еуро төлейді, ал қосымша 6 миллион еуро бонус шарттар орындалған жағдайда берілуі мүмкін. Кей деректерде жалпы құны 42,5 миллион еуроға дейін жетуі ықтимал екені айтылады. Сондай-ақ “Лион” ойыншыны келесі сатудан 15 % үлеспен қамтамасыз етті.
Джек Грилиштің “Эвертонға” жалға кетуінен кейін босап қалған 10-нөмірлі жейдені Шерки иеленді. Пеп Гвардиола оның техникалық шеберлігі мен алаңдағы креативті ойы “Ситидің” шабуыл күшін арттыратынына сенеді.
