Алматының «Қайрат» клубының бас бапкері Рафаэль Оразбахтин Чемпиондар лигасында мадридтік «Реалдан» ірі есеппен жеңілгеннен кейін Instagram парақшасында жаңа жазба жариялады.
Рафаэль Радикович өзінің парақшасына мадридтіктердің бапкері Хаби Алонсо екеуінің суретін салды. Бұл сурет Алматыдағы Орталық стадионның дәлізінде түсірілген.
«Өсу мен даму ең мықтыларға қарсы ойнағанда болады», — деп жазды Оразбахтин суретке қосымша пікір ретінде.
Еске салайық, «Қайрат» – «Реал Мадрид» матчы 30 қыркүйекте өтті және испаниялық грандтың пайдасына 5:0 есебімен аяқталды. Бұл жеңіліс алматылықтар үшін Чемпиондар лигасындағы қатарынан екінші сәтсіздік болды – оған дейін «Қайрат» сырт алаңда лиссабондық «Спортингке» (1:4) есе жіберген еді.
