Бапкердің айтуынша, шешім қысқа уақытта қабылданып, команданың жұмысы шұғыл түрде басталған.
Қазақстан ұлттық құрамасының бас бапкері Талғат Байсұфинов Лихтенштейнге қарсы матч алдындағы баспасөз мәслихатында команданың дайындығы, жаттығу барысы және не себепті Нұрбол Жұмасқалиевтің бапкерлік штабқа қосылмағаны туралы айтты.
Байсұфиновтың сөзінше, шешім оперативті жағдайда, қысқа уақытта қабылданған.
«29 қыркүйекте шұғыл түрде жұмысқа кірісу керек болды. Сол кезде Жұмасқалиевтің де есімі аталды. Бірақ, өкінішке қарай, ол кезде Нұрбол финалдық кубокқа дайындалып жатқан еді. Сондықтан ол ұлттық құрамамен бір уақытта жұмыс істей алмайтыны белгілі болды», — деді Байсұфинов.
Бас бапкердің айтуынша, ол өзіне бұрыннан таныс екі көмекшіні таңдаған.
«Маған жедел екі көмекші керек болды. Мен олармен бұрыннан жұмыс істеймін, бір-бірімізді жақсы білеміз. Осылайша процесті жеделдету үшін сол мамандарды шақырдым. Бұл шешімнің артында ешқандай саясат немесе федерацияның нұсқауы жоқ. Барлығы – уақыт пен тиімділікті сақтау үшін қабылданған шешім», — деді ол.
Байсуфинов сондай-ақ ұлттық құраманың жауапкершілігі жоғары екенін атап өтті:
«Бұл – ұлттық құрама. Мұнда әр шешім маңызды. Біз өз елінің намысын қорғап жүргенімізді жақсы түсінеміз. Команда да, капитан да ұзақ үзілістен кейін барын салуға дайын», — деді бас бапкер.
