Қазақстан әйелдер футболының жаңа тарихы жазылды. «Ақтөбе» 12 жыл бойы ел біріншілігінде үстемдік еткен «БИІК-Қазығұрттың» гегемониясына нүкте қойды.
Бұған дейін 2012 жылы алтынды алматылық «СШВСМ–Қайрат» иеленген. Сол жылдан бері шымкенттік команда чемпиондық атақты ешкімге бермей келген еді.
Биылғы маусымның шешуші сәті 26-турда анықталды. Барлық ойын бір уақытта басталып, тартыс қыза түсті.
Егер «Ақтөбе» «Астана» клубынан ұтылып қалса, «БИІК-Қазығұрт» кезекті мәрте чемпион атанар еді. Бірақ ақтөбелік арулар өз мүмкіндігін жібермей, ел чемпионы атанды.
Үшінші орын мен қола медаль Түркістанның «Томирис-Тұран» клубына бұйырды.
Жекелей көрсеткіштер бойынша «Актөбе» шабуылшысы Алина Литвиненко маусымның нағыз жұлдызы атанды. Ол 72 гол соғып, қарсыласы — «БИІК-Қазығұрттың» грузин шабуылшысы Гульнара Габелиядан небәрі екі допқа озып шықты (70 гол).
Үздік үштікті тағы бір «Ақтөбе» ойыншысы — ресейлік Наталья Нурмиева түйіндеді (37 гол).
