Қазақстан құрамасының қорғаушысы Нұралы Әліп Ресей Премьер-лигасының 13-туры аясында «Зенит» — «Динамо Мәскеу» матчында толық ойын өткізіп, командасына маңызды жеңіс әкелуге үлес қосты.
Кездесу тартысты өрбіді. Алдымен 26-минутта Бителло «Динамоны» алға шығарды. Алайда «Зенит» бірінші тайм соңында есепті теңестірді. Мергендік танытқан Андрей Мостовой.
Екінші таймда шешуші голды Густаво Мантуан соғып, 71-минутта питерліктерді алға шығарды. Осылайша «Зенит» мінез көрсетіп, жеңісті жұлып алды.
Нұралы Әліп матчта толық 90 минут ойнады және қорғаныста сенімді ойынымен көзге түсті. Оның әрекеттері «Динамоның» шабуылын бірнеше рет тоқтатуға көмектесті.
Айта кетсек, «Динамо» сапындағы қазақстандық ойыншы Бақтиер Зайнутдинов бұл кездесуге жарақатына байланысты қатысқан жоқ.
Осылайша «Зенит» 26 ұпаймен РПЛ кестесінде үшінші орынға көтерілді. Ал «Динамо Мәскеу» 16 ұпаймен тоғызыншы орынға сырғыды.
