Қазақстандық жас футболшы Дастан Сәтпаевтың келесі маусымдағы жаңа клубы анықталды.
Ағылшынның TheChelseaChronicle.com сайтының хабарлауынша, лондондық «Челси» талантты ойыншыны алдымен «Страсбурге» (Франция) жалға беруді жоспарлап отыр.
Қазір 17 жастағы Сәтпаевтың ойын құқығы «Челсиге» тиесілі. Бірақ футболшы ресми түрде ағылшын клубының жүйесіне 2026 жылы 18 жасқа толғанда қосылады.
Ағылшын басылымының мәліметінше:
«Ол тамыз айында „Челсиге“ ресми түрде қосыла алады, алайда ең ықтимал нұсқа — алдымен „Страсбургте“ жалға ойнау. Бұған дейін Сантос, Кендри Паэс және Майк Пендерс секілді жас таланттар да осы жолдан өткен. Олар кейін „Стэмфорд Бриджде“ негізгі құрамның ойыншыларына айналды».
Дастан Сәтпаев – соңғы жылдары шетел клубтарының назарын аударған сирек қазақстандық ойыншылардың бірі. Егер жоспар іске асса, ол ҚПЛ-дан Еуропаның үздік лигаларының біріне тікелей өтетін алғашқы жас шабуылшылардың бірі болмақ.
