Египет құрамасының жұлдызы Мохамед Салах бас бапкер Арне Слотпен арадағы келіспеушіліктен кейін «Ливерпульдің» матчтық өтініміне қайта енгізілді.
Белгілі инсайдер Фабрицио Романоның мәліметінше, 33 жастағы вингер мерсисайдтықтардың АПЛ-дегі алдағы ойыны — «Брайтонға» қарсы матчтың өтінім тізіміне кірген.
Тағы бір журналист Льюис Стил Салах пен Слоттың жақында жеке кездескенін, әңгіменің жалпы оң нотада өрбігенін айтады. Дегенмен дереккөздерге сенсек, олардың арасындағы дау әзірге түбегейлі реттеліп біткен жоқ.
Салахтың мәселесі 8 желтоқсанда берген сұхбатынан кейін ушыққан. Онда ол «Ливерпульдің» ішкі жағдайына және бас бапкер Арне Слоттың жұмысына қатысты сын айтқан.
Осыдан соң египеттік футболшы Чемпиондар лигасындағы «Интерге» қарсы кездесуде «қызылдардың» тізімінен тыс қалған.
