Халықаралық футбол тарихы және статистика федерациясы (IFFHS) ресми сайтында әлемдегі ең үздік 500 клубтың жаңартылған рейтингін жариялады.
IFFHS рейтингіне енген жалғыз қазақстандық клуб – алматылық "Қайрат". Рейтингте "Қайрат" 90,75 ұпай жинап, 240-орында тұр.
Дегенмен алматылық клубтың рейтингте кейбір танымал клубтардан жоғары тұрғанын айта кетейік. Мысалы, франциялық "Ницца" 242-ші, испаниялық "Севилья" 252-ші, ал Англияның "Вест Хэм" клубы 253-орынды иеленген.
Рейтингте көш бастап тұрған клубтарға келсек, бірінші орында Францияның "Пари Сен-Жермен" клубы, екінші орында "Реал Мадрид" тұр. Ал үздік үшікті Лондонның "Челси" командасы түйіндеген.
Рейтинг командалардың 2024 жылғы 1 желтоқсаннан 2025 жылғы 30 қарашаға дейінгі көрсеткіштерін ескере отырып жасалған.
Естеріңізге салсақ, биыл алматылық клуб өз тарихында алғаш рет Чемпиондар лигасының жалпы кезеңіне шыққан болатын. Алты турдан кейін "Қайрат" 1 ұпаймен 36 орында орналасты. 2026 жылдың қаңтар айында алматылықтар "Астана-аренада" "Брюггені' қабылдайды, және Англия астанасында "Арсеналға" қарсы ойнайды.
