Қазақстан футзал федерациясының президенті Нұрсұлтан Құрман кәсіпкер Тимур Турловтың «Астана» футбол клубын жекешелендіруден бас тартуына не түрткі болғанын түсіндірді.
Құрманның Aman Vibe YouTube-арнасындағы сұхбатта айтуынша, бастапқыда «Астананы» Турлов алуы мүмкін болған:
«Ол Астанада мәселелерді шешу қиын екенін айтты, сондықтан Қарағандыға кетті. Астанада клубты приватизациялау да, академия салу үшін жер алу да оңай емес. Жер мәселесі бар», — деді Нұрсұлтан Құрман.
Еске салайық, қараша айында Тимур Турлов Қарағандының «Шахтер» клубының иесі атанды. БАҚ-тағы мәліметтер бойынша, кәсіпкер футбол академиясы мен манеж салуды жоспарлағанын, клубқа 26,5 млрд теңге көлемінде инвестиция бөлетінін жариялаған.
Сондай-ақ Турловтың байлығы 5,8 млрд доллар шамасында, әрі ол Қазақстандағы ең дәулетті кәсіпкерлер тізімінде алдыңғы орындарда тұр.
Бұған дейін ақпарат кеңістігінде «Астананың» қаржылық қиындықтары жөнінде деректер тараған еді. Жазылған мәліметке сенсек, клубтың негізгі демеушісі саналатын «Самұрық-Қазына» АҚ келесі маусымға қаржы бөлу мәселесінде қолдауды тоқтатуы мүмкін деген сөз болған.
