Қазақстан чемпионатының бес дүркін чемпиондары трансферлік ауысым кезеңін өте қарқынды өткізуде. Құрамды күшейту мақсатында "Ақтөбе" тағы екі легионерді өз сапына қосуды жоспарлап отыр.
Жақын арада "Ақтөбе" сапына екі шетелдік футболшы қосылуы мүмкін. Бұл туралы "Серый Cardinal" Telegram-арнасы хабарлады.
Дереккөздің мәліметінше, трансферлік терезе жабылғанға дейін командаға екі легионер келеді. Олардың бірі — даниялық қорғаушы Якоб Киилерих. Ал екіншісі — 2026 жылғы әлем чемпионатына Кабо-Верде құрамасы сапында қатысуы ықтимал футболшы. Айта кетейік, Кабо-Верде — Португалияның бұрынғы отары. Бұл трансферлерден клубтың португалиялық бағытқа бет бұрғанын аңғаруға болады, деп тұспалдады дереккөз.
Қазір "Ақтөбе" құрамында 9 шетелдік ойыншы бар. Жаңа легионерлер тіркелсе, олардың біріне командадан кетуге тура келеді. Болжам бойынша, клубпен қоштасуы мүмкін футболшы – Рабиу.
Еске салайық, биылғы маусымаралық кезеңде "Ақтөбе" айтарлықтай резонанс тудырған трансфер жасады. Команда Португалия құрамасының және "Спортинг", "Манчестер Юнайтед" клубтарының бұрынғы ойыншысы Нанимен келісімшартқа отырған болатын.
