Италиялық алпауыт ерекше форманы 21 ақпан күні "Комоға" қарсы матчта киіп шығатыны белгілі.
Италияның атақты "Ювентус" клубы ішкі біріншілік аясындағы алдағы матчқа ерекше форма киіп шықпақ. Ерекше болғаны соншалық, оның дизайны әлеуметтік желілерде қызу талқыға түсіп, "түрме стилі" деген атауға да ие болды.
Туриндік команда 128 жылдық тарихында алғаш рет дәстүрлі тік қара-ақ жолақтардың орнына көлденең жолақты жейдемен ойнайды.
"Ювентус" бұл бірегей форманы 21 ақпанда "Комоға" қарсы матчта кимек. Кездесу А сериясы аясында өтеді.
Жаңа дизайн бірден жанкүйерлер назарын аударды. Әлеуметтік желілерде кей қолданушылар форманы "түрме киіміне" ұқсатса, енді бірі оны батыл эксперимент деп бағалады.
"Тұтқын стилі" атауы тіпті 2006 жылғы "Кальчополи" жанжалымен байланыстырылған пікірлер де бар. Естеріңізде болса, сол жылы келісілген матчтарға қатысты дауға байланысты "Ювентус" В сериясына түсіп қалған еді.
Сарапшылардың пікірінше, жаңа форма – клубтың маркетингтік стратегиясының бір бөлігі. Ерекше дизайн жанкүйерлер арасында қызығушылық тудырып, сатылымды арттыруы мүмкін.
