ПСЖ клубы мен оның бұрынғы ойыншысы Килиан Мбаппе арасындағы қаржылық дау қайта ушықты.
Бұл текетірес 2024 жылдың жазында Мбаппенің ПСЖ-дан еркін агент ретінде “Реалға” ауысуынан кейін басталған. Тараптар келісімшарттың соңғы кезеңіндегі жалақы мен бонус төлемдері бойынша ортақ шешімге келе алмаған.
Франциядағы еңбек дауын қарайтын сот (Париж еңбек соты/еңбек даулары жөніндегі орган) ПСЖ-ны Мбаппеге шамамен 60,9 млн еуро төлеуге міндеттеген. Бұл соманың ішінде 55 млн еуро (жалақы және түрлі бонус), сондай-ақ шамамен 5,9 млн еуро (ақылы демалыс өтемақысы мен қарыз бойынша пайыздар) бар екені көрсетілген.
Жергілікті деректерге сай, қазірге дейін Мбаппе 55 млн еуро алған. Кейін сот орындаушылары араласқаннан соң ПСЖ қосымша тағы 4 млн еуро аударған. Бірақ соңғы 2 млн еуро әлі төленбегені айтылады.
Париждік клуб болса, өз тарапынан барлық төлемдер әлдеқашан жабылды деген ұстанымды қайталап отыр.
Даудың тағы бір бөлігі — сот шешіміне қатысты ақпаратты ПСЖ ресми сайтында бір ай бойы жариялау талабы. Мәліметтер бойынша, клуб бұл талапты орындауға қатысты Мбаппенің талабымен де келіспей отыр.
