Иран әлем чемпионатына қатысады
Иран құрамасы футболдан әлем чемпионатына қатысып, жоспарланған матчтарын АҚШ аумағында өткізеді. Бұл туралы ФИФА президенті Джанни Инфантино Ванкуверде өткен ұйым конгресінде мәлімдеді.
Инфантино: "Футбол әлемді біріктіреді"
ФИФА басшысының айтуынша, Иран құрамасының турнирге қатысуына қатысты шешім өзгермейді. Инфантино футболдың негізгі миссиясы халықтарды жақындастыру екенін атап өтті.
"Иран әлем чемпионатына қатысады. Әрине АҚШ-та ойнайды. Мұның себебі қарапайым — біз адамдарды біріктіруге тиіспіз. Бұл біздің жауапкершілігіміз. Футбол әлемді біріктіреді", — деді Джанни Инфантино.
Иран кімдермен ойнайды?
2026 жылғы әлем чемпионатының топтық кезеңінде Иран құрамасы мына командалармен кездесуі тиіс:
Жаңа Зеландия, Бельгия және Мысыр.
Аталған ойындардың барлығы АҚШ аумағында өтеді деп жоспарланған.
Бұған дейін қандай ақпарат тараған еді?
Бұған дейін Таяу Шығыстағы жағдайдың шиеленісуіне және АҚШ-тың бұл үдеріске қатысуына байланысты Иран құрамасы турнирден бас тартуы мүмкін екені айтылған. Кейбір ақпараттарға сәйкес ирандық тарап матчтарды АҚШ-тан тыс жерде өткізуді қалаған.
Сондай-ақ Иран құрамасының ойындарын Мексикаға ауыстыру нұсқасы да қарастырылғаны хабарланған. Бірақ Мексика президенті Клаудия Шейнбаум ФИФА мұндай шешімге бармайтынын, себебі бұл логистикалық қиындықтарға әкелетінін мәлімдеген.
ФИФА позициясы өзгермейді
Джанни Инфантино бұған дейін де Иран құрамасының әлем чемпионатына келетінін айтқан. Енді ФИФА басшысы бұл ұстанымды тағы да нақтылап, Иранның 2026 жылғы мундиальға қатысатынын және матчтарын АҚШ-та өткізетінін растады.
Айта кетейік, 2026 жылғы футболдан әлем чемпионаты АҚШ, Канада және Мексикада өтеді.