"Ертіс" стадионына Франциядан жеткізілген шөп төселуде
Орталық стадионда сонымен қатар, ішкі жөндеу жұмыстары жүргізіліп, автоматтандырылған суару жүйесі орнатылуда.
Павлодардағы Орталық стадионда газон ауыстыру жұмыстары аяқталуға жақын. Бұл арена Қазақстан Премьер-лигасында өнер көрсететін "Ертіс" футбол клубының стадионы саналады.
Irbis.tv мәліметінше, стадионға арнайы Франциядан жеткізілген жаңа газон төселіп жатыр.
Мамандардың айтуынша, жаңа жасанды газон қазіргі талаптарға сәйкес келеді. Ол футболшыларға матчтар мен жаттығуларды жоғары деңгейде өткізуге мүмкіндік беруі тиіс.
Стадионда қосымша жөндеу жұмыстары жүріп жатыр
Газон төсеумен қатар, арена ішіндегі бөлмелер де жөнделіп жатыр. Сондай-ақ стадионда автоматтандырылған суару жүйесі орнатылуда.
Бұл жүйе алаңды тиісті деңгейде күтіп ұстауға көмектеседі және қызмет көрсету шығындарын азайтуға мүмкіндік береді.
"Ертіс" әзірге өз матчтарын Астанада өткізеді
Павлодардағы Орталық стадионда жөндеу жұмыстары 2026 жылдың сәуір айының соңында басталды. Осыған байланысты "Ертіс" ҚПЛ-дегі матчтарын уақытша Астанадағы "Астана Арена" стадионында өткізіп жүр.