ӘЧ-2026: Өзбекстанның соңғы матчы Оңтүстік Кореяның турнирдегі тағдырын шешті
Жуырда африкалық команда Өзбекстанды 3:1 есебімен жеңіп, 1/16 финалға жолдама алған болатын.
Конго ДР құрамасы 2026 жылғы футболдан әлем чемпионатының топтық кезеңіндегі соңғы турда Өзбекстанды 3:1 есебімен жеңді. Бұл нәтиже африкалық командаға плей-оффқа жолдама алуға мүмкіндік берді, ал Өзбекстан дебюттік мундиалін ұпайсыз аяқтады.
Кездесу АҚШ, Канада және Мексикада өтіп жатқан әлем чемпионатының K тобы аясында ұйымдастырылды. Матч Атланта қаласында өтіп, тартысты ойынмен есте қалды.
Өзбекстан ерте есеп ашты
Ойынның басында Өзбекстан құрамасы алға шықты. 10-минутта ресейлік "Ростов" клубында ойнаған шабуылшы Элдор Шомуродов мергендігімен көзге түсті.
Бұл гол өзбекстандықтарға матчты сенімді бастауға мүмкіндік бергенімен, команда басымдығын сақтап қала алмады. Екінші таймда Конго ДР шабуылдағы қарқынын арттырып, кездесу тағдырын өзгертті.
Африкалықтар есепті 68-минутта теңестірді. Йоан Висса пенальтиді дәл орындады. Араға он минут салып, Фистон Майеле командасын алға шығарды. Ал негізгі уақытқа қосылған минуттарда Йоан Висса дубль жасап, матчтың соңғы есебін белгіледі.
Қорытынды есеп — 3:1.
Конго ДР үшінші орыннан плей-оффқа өтті
Бұл жеңістен кейін Конго ДР құрамасы төрт ұпаймен K тобында үшінші орынға тұрақтады. Осы нәтиже африкалық командаға 1/16 финалға шығуға жеткілікті болды.
Ал Өзбекстан дебюттік әлем чемпионатын ұпайсыз аяқтады. Үш матчтың қорытындысы бойынша Өзбекстан K тобында соңғы, төртінші орында қалды.
Бұл нәтиже Оңтүстік Кореяға да әсер етті
Конго ДР Өзбекстанды жеңуі басқа топтағы жағдайға да әсерін тигізді. Осы нәтиженің арқасында Оңтүстік Корея құрамасы A тобында үшінші орыннан 1/16 финалға шығу мүмкіндігінен айырылды.