"Жетісу" Қайрат Нұрдәулетовке қатысты шешім қабылдады

Маусым соңына дейін командада қалады

Инсайдер Елдар Аманбаевтың мәліметінше, “Жетісудың” биылғы чемпионаттағы қорытынды нәтижесіне қарамастан клуб Қайрат Нұрдәулетовпен жаңа келісімге келмейді.

“Талдықорғандық “Жетісудың” бас бапкері Қайрат Нұрдәулетов ағымдағы маусым аяқталған соң қызметінен кетеді. Мендегі ақпарат бойынша клуб басшылығы маусым нәтижесіне қарамастан қазақстандық маманмен келісімшартты ұзартпау туралы шешім қабылдаған”, – деп хабарлады Аманбаев.

Сонымен қатар маман чемпионат толық аяқталғанға дейін өз міндетін атқара береді.

“Жетісу” ҚПЛ-да қалу үшін күресіп жатыр

Қазір талдықорғандық команда үшін басты міндет – Қазақстан Премьер-лигасындағы орнын сақтап қалу. “Жетісу” турнир кестесінің төменгі бөлігінде орналасып, жоғарғы дивизионнан түсіп қалмау үшін күресін жалғастырып келеді.

Сондықтан Қайрат Нұрдәулетов маусымның қалған матчтарында команданы қиын жағдайдан алып шығуға тырысады.

Қазақстандық маман “Жетісудың” бас бапкері қызметіне былтыр 17 желтоқсанда тағайындалды. Оның жетекшілігімен талдықорғандық команда осы уақытқа дейін 25 ресми матч өткізді. (6 жеңіс, 7 тең ойын және 12 жеңіліс)