Қырғызстан шетелдік бапкерлерден бас тартты

Қырғызстан футболында ұлттық мамандарға басымдық беріле бастады. Қазіргі таңда елдің негізгі құрамасынан бастап түрлі жас санатындағы командаларға дейінгі бес құраманың барлығын жергілікті бапкерлер басқарады.

25 маусымда Қырғыз футбол одағы ұлттық құраманың бас бапкері Роберт Просинечкимен ынтымақтастықты тоқтату туралы шешім қабылдады. Хорватиялық маманның орнына бұған дейін Қырғызстанның U-23 құрамасын жаттықтырған Ұрмат Абдукаимов тағайындалды. Осылайша, Қырғызстан құрамаларының бас бапкерлік қызметіндегі соңғы шетелдік маман да орнын босатты.

Бұған дейін құрамаларды кім жаттықтырды?

Бұған дейін U-23 құрамасын украиналық Эдмар Ласерда жаттықтырған. Ал U-17 командасын 2025 жылы австриялық Александр Бауэр басқарды. Алайда ол Азия кубогының іріктеу кезеңінде Пәкістан мен Йеменнен жеңілгеннен кейін қызметінен кеткен.

Қырғыз футбол одағы бұған дейін 16 және 23 жасқа дейінгі ұлттық құрамаларды дамыту тұжырымдамасын қабылдаған болатын. Құжатқа сәйкес, аталған жас санаттарындағы командалардың бас бапкері қызметіне тиісті біліктілігі бар отандық мамандар тағайындалуы тиіс.

Қазір Қырғызстанның бес құрамасын жергілікті бапкерлер жаттықтырады:

• U-15 — Владимир Сало;
• U-17 — Игорь Кудренко;
• U-20 — Нұрбек Жолдошев;
• U-23 — Надырбек Мамадалиев;
• ұлттық құрама — Ұрмат Абдукаимов.

Осылайша, Қырғызстан футболындағы ұлттық құрамалар жүйесі толығымен жергілікті мамандардың қолына өтті.