Испания футбол федерациясы қазақстандық клубтың ойынына жоғары баға берді
Жуырда "Семей" клубы Чемпиондар лигасы аясында "Барселонаға" қарсы кездесу өткізген болатын.
Испания футбол федерациясы футзалдан УЕФА Чемпиондар лигасының негізгі кезеңінде "Барселонаға" қарсы ойнаған қазақстандық "Семей" клубының деңгейін жоғары бағалады.
Каталониялық команда кездесуде 6:1 есебімен ірі жеңіске жеткенімен, федерация матч туралы есебінде "Семейді" мықты әрі оңай қарсылас болмағанын атап өтті.
"Еурокубок турнирінің негізгі кезеңіндегі екінші матчта "Барса" мықты "Семеймен" кездесті. Жоғары деңгейдегі бұл текетірес Хави Родригес шәкірттері үшін маңызды сынақ болды. Команда маңызды жеңіске жетіп, топтың көш басына шықты. Жеңістің негізгі факторлары – шабуылдағы әсерлі ойын мен сенімді қорғаныс", – делінген материалда.
Кездесу Словакияның Лученец қаласында өтті. Қазақстандық клуб сапындағы жалғыз голдың авторы бразилиялық Дедезиньо болды.
Плей-офф жолдамасы үшін күрес жалғасады
"Семей" топтық кезеңдегі соңғы матчын сенбі күні Швейцарияның "Минерва" клубына қарсы өткізеді.
Регламент бойынша төрт командадан тұратын топтың үздік үш ұжымы Чемпиондар лигасының плей-офф кезеңіне жолдама алады.