Қазақстан Еуро-2027 іріктеуінде Австрияның тас-талқанын шығарды
Футболдан Қазақстанның 17 жасқа дейінгі құрамасы 2027 жылғы Еуропа чемпионатының іріктеу кезеңін ірі жеңіспен бастады.
Австрия қақпасына жауапсыз жеті гол соғылды
Грузияның Кутаиси қаласында өтіп жатқан Еуро-2027 іріктеу турнирінің алғашқы кезеңінде Қазақстан жасөспірімдер құрамасы керемет нәтиже тіркеді. 14-топ аясында Австриямен кездескен Русланжан Райымбақиев шәкірттері қарсыластарына еш мүмкіндік қалдырмады.
Матчтың 19-минутында Роман Черноморец есеп ашты. Арада небәрі екі минут өткенде Әнуар Төленді басымдықты еселеді. Ол 24-минутта тағы бір мәрте мергендігімен көзге түсті.
Бірінші тайм аяқталар тұста Сәлім Хасанов төртінші голды соқты. Осылайша қазақстандық футболшылар үзіліске 4:0 есебімен шықты.
Екінші таймда тағы үш гол соғылды
Үзілістен кейін де отандастарымыз шабуылын бәсеңдеткен жоқ. 60-минутта Ислам Рашидов есепті 5:0-ге жеткізсе, үш минуттан соң Роман Черноморец өзінің екінші голын соқты. Ал кездесудің 78-минутында Ибраһим Асан матчтағы соңғы нүктені қойды.
Қазақстан U-17 құрамасы іріктеу кезеңіндегі келесі кездесуін 17 қарашада өткізеді. Бұл жолы Русланжан Райымбақиев баптайтын команда шағын турнирдің қожайыны Грузиямен кездеседі.
Қазақстан U19